Inawit ang Nibalya da Kalingga (Kasal ng Magkaaway) mula sa Taloktok, Katimugang Kalinga na hinango sa The Kalinga Ullalim II (1974) nina Padre Francisco Billiet at Padre Francis Lambrecht. Tinataglay ng Ullalim ang mga halagahan at kultura ng sinaunang lipunang Kalingga. Wika ni Dr. Virgilio S. Almario sa kanyang introduksiyon, "Pruweba ang Nibalya da Kalingga hinggil sa sinaunang talino upang humabi ng isang masalimuot na salaysay."

Pinatatatag ng epikong-bayan ang mataas na antas ng malikhaing isipan at diwa. Pinasisilip din tayo nito sa mundong nilikha ng ating mga ninuno, ang kanilang sagradong imahinasyon. Binibigyan tayo ng pagkakataon sa repleksiyon at pagbulay-bulay. Itinatampok ngayon ang kauna-unahang salin sa Filipino sa muling paglalathala sa Ullalim: Nibalya da Kalingga (Kasal ng Magkaaway). Matalik nating kilalanin sina Banna ng Dulawon at Onnawa ng Lukiban at ang buong mundo ng Ullalim.